अमेरिकी- इजरायली आक्रमणमा इरानका सर्वोच्च नेता अली खामेनीको मृत्यु

खामेनीको मृत्युको शोक मनाउन इसफानको सडकमा उत्रिएका इरानी जनता ।

इरानले मार्च १ को बिहानै सर्वोच्च नेता आयातोल्लाह अली खामेनीको मृत्यु भएको पुष्टि गरेको छ। फेब्रुअरी २८ मा इरानभरिका विभिन्न स्थानहरूमा अमेरिका र इजरायलद्वारा गरिएको हवाई आक्रमणमा खामेनी र उनका परिवारका सदस्यहरू मारिएका हुन्। सर्वोच्च नेताका अतिरिक्त, धेरै उच्च अधिकारी र कमाण्डरहरू सहित २०० भन्दा बढी इरानीहरूको मृत्यु भएको छ भने सयौँ घाइते भएका छन्। इरानले ४० दिने राष्ट्रिय शोकको घोषणा गरेको छ र अमेरिका-इजरायलको यस आक्रमणको विरुद्धमा देशभरका सहरहरूमा विशाल प्रदर्शनहरू सुरु भएका छन्।

आयातोल्लाह खामेनीको हत्या इस्लामिक गणतन्त्र विरुद्धको अमेरिकी-इजरायली आक्रामकतामा एक महत्त्वपूर्ण मोडको रूपमा हेरिएको छ, जसको पछिल्लो चरण फेब्रुअरी २८ बाट सुरु भएको थियो। यो आक्रमण ओमानको मध्यस्थतामा भइरहेको वार्ताको बीचमा कुनै उक्साहट बिना नै एकतर्फी रूपमा गरिएको मात्र नभई, स्पष्ट रूपमा देशको राजनीतिक नेतृत्वलाई समाप्त पार्ने उद्देश्यले गरिएको थियो।

खामेनीको हत्याको खबरको प्रतिक्रियामा, इरानको सशस्त्र बलको जनरल स्टाफले "यस राष्ट्रका शत्रुहरू, विशेष गरी अपराधी अमेरिका र अभिशप्त जियोनिस्ट शासन" लाई उनीहरूको कार्यमा पछुतो गराउने घोषणा गरेको छ। त्यसैगरी, इरानी सेनाले एक विज्ञप्ति जारी गर्दै "यो जघन्य अपराधको जवाफ नदिई नछोडिने" र देशको स्वतन्त्रता, क्षेत्रीय अखण्डता र राजनीतिक व्यवस्थाको रक्षा जारी राख्ने प्रतिज्ञा गरेको छ। इस्लामिक रिभोलुसनरी गार्ड कर्प्स (IRGC) ले "प्रतिशोधको एक फरक र कठोर कदम" चाल्ने र "कब्जा गरिएका क्षेत्रहरू र अमेरिकी आधार शिविरहरूमा" खतराको साइरनहरू शान्त हुन नदिने कसम खाएको छ।

फेब्रुअरी २८ मै इरानको प्रतिक्रिया निकै सशक्त देखिएको थियो। बहराइन, संयुक्त अरब इमिरेट्स, कुवेत, कतारमा रहेका २० भन्दा बढी अमेरिकी सैन्य अखडा र इजरायलका सैन्य तथा औद्योगिक लक्ष्यहरूमा मिसाइल आक्रमणहरू गरिएका थिए। इजरायली अधिकारीहरूले इरानको प्रतिशोधात्मक आक्रमणमा २० भन्दा बढी व्यक्तिको मृत्यु भएको पुष्टि गरेका छन्।

अमेरिकी राष्ट्रपति डोनाल्ड ट्रम्पले अमेरिका र इजरायलको उत्तेजक आक्रमणप्रति इरानी अधिकारीहरूले व्यक्त गरेको आक्रोशलाई अस्वीकार गरिदिएका छन्। उनले सामाजिक सञ्जालमा एक सन्देश जारी गर्दै इरानलाई धम्की दिएका छन्: “इरानले भर्खरै भनेको छ कि उनीहरूले आज धेरै कडा प्रहार गर्नेछन्, जुन उनीहरूले पहिले गरेको प्रहारभन्दा कडा हुनेछ। तर उनीहरूले त्यसो नगरेकै राम्रो हुन्छ, किनकि यदि उनीहरूले त्यसो गरे भने, हामीले उनीहरूमाथि यस्तो शक्तिका साथ प्रहार गर्नेछौं जुन पहिले कहिल्यै देखिएको थिएन!”

Source: https://peoplesdispatch.org