अझै मरेको छैन पुस्तक प्रेम !

भरखरै मात्र ठूलो तामझामका साथ अयोध्यामा राम मन्दिरको प्राण प्रतिष्ठा भयो । भारत सरकार आफैं सक्रिय भएर लागिपरेको उक्त मन्दिरको दर्शन गर्न ११ दिनमा २५ लाख मानिसहरु सहभागी भएका थिए । त्यस अवसरमा ८ करोड रुपियाँ भेटी संकलन भएको थियो । त्यो धर्मप्रति आम भारतीय रुझानको प्रतिक थियो । तर त्यो भन्दा पनि बढी मानिस कलकत्तामा भरखरै सम्पन्न पुस्तक मेलामा सहभागी भएका थिए । त्यसले कलकत्ताका मानिसहरुमा रहेको अद्भूत पुस्तक प्रेम एवं पठन संस्कृतिलाई प्रकट गरेको थियो ।

गत जनवारी १८ देखि ३१ सम्म चलेको सो अन्तर्राष्ट्रिय पुस्तक मेलामामा २९ लाख मानिसहरु सहभागी भएका थिए । त्यस मेलामा २७ करोड भारतीय रुपियाँ बराबरको किताबहरु बिक्री भएको थियो । अघिल्लो बर्ष भएको पुस्तक मेलामा पनि २५ लाख मानिसहरु सहभागी भएका थिए र त्यसबेला २५ करोड भारतीय रुपियाँ बराबरको पुस्तकहरु बिक्री भएको थियो । यसपालि अघिल्लो पटकभन्दा सहभागिता तथा पुस्तकको समेत बिक्री बढेको हो ।

 सबैभन्दा अद्भूत कुरा त के पनि भयो भने यस पटकको पुस्तक मेलामा देवब्रत चटर्जी नाम गरेका पुस्तक प्रेमी एक्लैले ३ लाख १५ हजार भारतीय रुपियाँ बराबरको पुस्तक किनेका छन् । पेशाले निजी शिक्षक चटर्जीको पुस्तक प्रेमलाई देखेर पब्लिशर्स एण्ड बुक सेलर्स गिल्डले उनलाई सम्मानित गरेको छ ।

Image source: https://www.hindustantimes.com/