एमाले केन्द्रीय कार्यालय आफ्नै जग्गामा बनाउन माग

तस्विर: https://cpnuml.org/

काठमाडौँ । नेकपा (एमाले) को केन्द्रीय कार्यालय भवन निर्माणका विषयमा बहस चुलिएका बेला पार्टीकै एक पंक्तिले बल्खुस्थित मदननगरमा रहेको आफ्नै स्वामित्वको जग्गामा कार्यालय बनाउन माग गरेको छ । ‘आत्मनिर्भरताका लागि ५००० बाट ५००० राष्ट्रिय अभियान’ का तर्फबाट एक विज्ञप्ति जारी गर्दै एमालेको ऐतिहासिक र भावनात्मक विरासत जोडिएको बल्खुमै कार्यालय निर्माण गर्न दबाब दिइएको हो ।

विज्ञप्तिमा काठमाडौँको बल्खुस्थित आफ्नै जग्गा हुँदाहुँदै अन्य निजी वा सार्वजनिक सम्पत्तिमा कार्यालय सञ्चालन गर्नु पार्टीको गरिमा र छवि अनुकूल नहुने उल्लेख गरिएको छ । २०७२ सालको भूकम्पअघि सोही स्थानबाट पार्टीको गतिविधि सञ्चालन हुँदै आएको स्मरण गराउँदै अभियानले उक्त स्थान प्राविधिक, भौगोलिक र ऐतिहासिक दृष्टिले समेत उपयुक्त रहेको ठहर गरेको छ ।

व्यापारीमा निर्भर नहुन आग्रह पछिल्लो समय पार्टी कार्यालयका लागि प्राप्त भएको भनिएको जग्गा र भवनका विषयमा सार्वजनिक रूपमा आलोचना भइरहेका बेला विज्ञप्तिमा भनिएको छ, “अब कुनै व्यापारी वा व्यक्तिमा निर्भर नभई आफ्नै पौरख र लगानीमा कार्यालय बनाउनु नै एमाले पंक्तिको स्वाभिमान हो । आत्मनिर्भरताले मात्रै पार्टीको संस्थागत गरिमा उच्च राख्न सक्छ ।”

५ हजारको अभियानलाई सदुपयोग गर्ने प्रस्ताव अभियानले पार्टी कार्यालय निर्माणका लागि २०७९ असारदेखि सञ्चालित ‘५००० बाट ५००० राष्ट्रिय अभियान’ मार्फत संकलन भएको रकमलाई नै सदुपयोग गर्न नेतृत्वको ध्यानाकर्षण गराएको छ । पार्टी सदस्य, शुभचिन्तक र आम सर्वसाधारणलाई श्रमदान र आर्थिक सहयोगका लागि आह्वान गर्दै आफ्नै पसिनाबाट भवन ठड्याउनुपर्नेमा जोड दिइएको छ ।

आफ्नै जमिनमा कार्यालय निर्माण गर्दा नयाँ पुस्तासँग पार्टीको सम्बन्ध प्रगाढ हुने र जनतामाझ मजबुत आधार निर्माण हुने विश्वास विज्ञप्तिमा व्यक्त गरिएको छ । एमालेको केन्द्रीय कार्यालय हाल च्यासलस्थित तुल्सीलाल स्मृति प्रतिष्ठानको भवनमा सञ्चालन भइरहेको छ । उक्त जग्गाको भोगाधिकार समाप्त भइसकेको आधारमा त्यहाँबाट पनि हट्नुपर्ने अवस्था हाल सिर्जना भएको छ ।