संगठित अपराध र ठगीको जालो: रवि लामिछानेसहित पाँच जनामाथि मुद्दा दायर

राष्ट्रिय स्वतन्त्र पार्टीका सभापति तथा पूर्वगृहमन्त्री रवि लामिछानेविरुद्ध सहकारी ठगी, संगठित अपराध र सम्पत्ति शुद्धीकरणको मुद्दा दायर भएको छ ।

प्रहरीले पुस ८ गते आइतबार लामिछाने लगायत  ५ जनालाई कास्की जिल्ला अदालतमा बयानका लागि उपस्थित गराएको छ । त्यसरी अदालतमा उपस्थित गराइएकाहरुमा लामिछाने, गोर्खा मिडियाका पूर्वउपाध्यक्ष तथा पूर्व डीआईजी छविलाल जोशी, रामबहादुर खनाल, लिला पछाइँ र सूर्यदर्शन सहकारीका सञ्चालक कृष्ण गुरूङलाई अदालतमा उपस्थित गराइएको हो ।

आजबाटै उनीहरुको बयान हुने र त्यसपछि थुनछेक बहस हुनेछ । थुनछेक बहसपछि मात्र उनीहरुलाई थुनामा राख्ने, धरौटी माग्ने वा सामान्य तारिखमा छाड्ने कुराको निर्क्यौल हुनेछ ।

रवि लगायतको समूहमाथि एक अर्ब ५१ करोड रुपैयाँ बिगो मागदाबी सहित सहकारी ठगी मुद्दा दायर गरिएको छ ।  उनीहरूमाथि संगठित समूह बनाएर योजनाबद्ध रूपमा ठगी गरेको आरोपमा संगठित अपराधको अभियोग पनि छ । त्यसमाथि थप,  सहकारीको रकम व्यक्तिगत रूपमा अनि गोर्खा मिडियामा संस्थागत रूपमा समेत अपचलन गरेको आरोप समेत उनीहरुमाथि छ ।

सम्पत्ति सुद्धिकरणको मुद्दाका कारण लामिछानेको सांसद पदसमेत निलम्बन भएको छ ।

सम्पत्ति शुद्धीकरण (मनी लाउन्डरिङ) निवारण ऐन, २०६४ २७. स्वतः निलम्बन हुने: प्रचलित कानून बमोजिम स्थापित संगठित संस्थाको कुनै पदाधिकारी वा कर्मचारी वा कुनै राष्ट्र सेवक यस ऐन बमोजिम थुनामा रहेकोमा त्यसरी थुनामा रहेको अवधिभर र निज उपर दफा २२ बमोजिम मुद्दा दायर भएकोमा सो मुद्दाको किनारा नभएसम्म त्यस्तो कर्मचारी, पदाधिकारी वा राष्ट्र सेवक स्वतः निलम्बन भएको मानिनेछ ।